صرت تايه بحبك مدري شلون
وگمت امشي بلا هويه
وصرت صافن وبس اهذي بيك
وصرت دم اليجري بيه
اغار عليك من امك وابوك
وبعد اكثر من عين الاليه
يال حلگك مدور محبس يگول
ويالي شفافك عسل هيه
وعليك عيون ما شايله مخلوق
تكتل بنضراته وتسحر خطيه
يالشعرك سرح ويهيم الكون
وخدودك گيمر وقشطه سويه
دخفف من جمالك لا تبقه هيج
يعني شلون ناويه الاذيه
ربك خالق الدنيه بفرد اسبوع
وانت ايام خلقك توصل الميه
عفيه احتار من اكتب شعر بيك
عجز بيك الشعر وكل قوافيه
عشگتك عشگ مخبل ومجنون
عشر بحور يملي وكل شواطيه
يجوز الجبل يتهدم بيوم
ويجوز البحر يحله ميه
ويجوز الشمس ما تشرق دگوم
ويجوز النحل يعوف الخليه
بس مال اعوفك والله مو معقول
اموت وروحي تطلع بين اديه
صح راح اعوفك بس تدري شلون
من اموت وتاخذني المنيه